ප්‍රතික්ෂේප වීම් මැදින් ජීවීතය දිනූ මිනිසා - ජැක් මා Jack Ma

 

"1980 ගණන්වල චීනයේ Hangzhou නගරයේ තරුණයෙක් හිටියා. එයාට ඕන වුණේ කොහොමහරි රක්ෂාවක් හොයාගෙන තමන්ගේ ජීවිතය ගොඩදාගන්න. ඒත් එයා ගිය ගිය හැම තැනකදීම ලැබුණේ ප්‍රතික්ෂේප කිරීම් විතරයි.KFC ආයතනය චීනයට ආපු මුල්ම කාලේ ඒකේ රක්ෂාවල් 24ක් සඳහා සම්මුඛ පරීක්ෂණ තිබ්බා. 24 දෙනෙක් සහභාගී වුණා. 23 දෙනෙක්ටම රක්ෂාව ලැබෙද්දී, එකම එක පුද්ගලයෙක්ව විතරක් ප්‍රතික්ෂේප වුණා. ඒ මෙන්න මේ තරුණයා. එතනින් නතර වුණේ නෑ, පොලිසියට බැඳෙන්න ගියත් 'ඔයා මේකට සුදුසු නෑ' කියලා එයාට කිව්වා. Harvard විශ්වවිද්‍යාලයට යන්න 10 වතාවක් උත්සාහ කරත් 10 වතාවෙම එයාව ප්‍රතික්ෂේප වුණා.1995 දී මේ තරුණයා ඇමරිකාවට යනවා. එහේදී එයා මුල්ම වතාවට ඉන්ටර්නෙට් (Internet) කියන දේ දකිනවා. එයා 'Beer' කියලා Search කරලා බැලුවත්, චීනය ගැන කිසිම තොරතුරක් එතන තිබුණේ නෑ. එදා තමයි එයාට හිතුණේ චීනය වෙනුවෙන් මොනවා හරි කරන්න ඕනේ කියලා.තමන්ගේ අතේ සත පහක් නැතිව, කිසිම තාක්ෂණික දැනුමක් (Coding) නැතිව, 1999 දී එයා තමන්ගේ මහල් නිවාසයට යාළුවෝ 17 දෙනෙක්ව කැඳවනවා. එතනදී තමයි 'Alibaba' කියන නම යටතේ මේ දැවැන්ත ගමන පටන් ගන්නේ. මුල් කාලේ මේ වෙබ් අඩවියෙන් කිසිම ලාභයක් ලැබුණේ නෑ. ගොඩක් අය කිව්වේ 'Alibaba' කියන්නේ මෝඩ වැඩක් කියලා. ලෝකයේ ප්‍රබල ආයෝජකයෝ පවා මේකට සල්ලි දාන්න බය වුණා.ඒත් එයා අතහැරියේ නෑ. හැමෝම 'නෑ' කියද්දී එයා 'ඔව්' කියලා විශ්වාස කරා. තමන්ගේ නිවසේ කුඩා කාමරයකින් පටන් ගත්තු ඒ ව්‍යාපාරය, අද වෙද්දී ඩොලර් බිලියන ගණනක් වටිනා ලෝකයේ විශාලතම අධිරාජ්‍යයක් බවට පත් වෙලා තියෙනවා.ජැක් මා කියන්නේ දක්ෂතාවයට වඩා උත්සාහය ලෝකය ජයගන්නා හැටි පෙන්නපු සජීවී උදාහරණයක්. වැටෙන වාරයක් පාසා දුවන්න පුරුදු වෙන්න. මොකද අද දවස අමාරු වෙන්න පුළුවන්, හෙට දවස ඊටත් වඩා දරුණු වෙන්න පුළුවන්, හැබැයි අනිද්දා දවස අනිවාර්යයෙන්ම හිරු පායන ලස්සන දවසක් වේවි."

 ළමා කාලය සහ ඉංග්‍රීසි ඉගෙනීම

ජැක් මා, උපත ලැබුවේ 1964 සැප්තැම්බර් 10 වන දින චීනයේ හංජෝ නගරයේදීය. ඔහුගේ දෙමාපියන් සාම්ප්‍රදායික චීන සංගීතඥයන් විය. වයස අවුරුදු 12 දී ඉංග්‍රීසි භාෂාවට දැඩි ආශාවක් ඇති වූ නමුත්, ඒ කාලයේ චීනයේ ඉංග්‍රීසි ඉගෙන ගන්න පාසල් හෝ පොත් තිබුණේ නැත. ඒ නිසා ජැක් සෑම උදෑසනකම හංජෝ හෝටලය ඉදිරිපිටට ගොස්, විදේශීය සංචාරකයින්ට නොමිලේ නගරයේ සංචාරක මඟ පෙන්වන්නෙකු ලෙස සේවය කළේය. ඒ වෙනුවට ඔහු ඔවුන්ගෙන් ඉංග්‍රීසි ඉගෙන ගත්තේය. අවුරුදු 9ක් තිස්සේ ඔහු මෙය කළ අතර, "ජැක්" යන නමද ලබා දුන්නේ ඔහුගේ චීන නම උච්චාරණය කිරීමට අපහසු වූ විදේශීය මිතුරෙකු විසිනි. ඔහු විශ්වවිද්‍යාල ප්‍රවේශ විභාගය දෙවරක්ම අසමත් වූ අතර, අවසානයේ හංජෝ ගුරු විද්‍යාලයට ඇතුළත් වී 1988 දී ඉංග්‍රීසි ගුරුවරයෙකු ලෙස උපාධිය ලබා ගත්තේය. 555c0c01

ප්‍රතික්ෂේප වීම් සහ අන්තර්ජාලය හඳුනාගැනීම

ජැක් මාගේ තරුණ කාලය ප්‍රතික්ෂේප වීම්වලින් පිරී තිබුණි. ඔහු රැකියා 30කට අයදුම් කළ නමුත් සියල්ලෙන්ම ප්‍රතික්ෂේප විය. පොලිස් සේවයට ඉල්ලුම් කළ විට "හොඳ නැත" කියා එළවා දැමීය. KFC ආයතනයට 24 දෙනෙකු සමඟ සම්මුඛ පරීක්ෂණයට ගිය විට, ඔහු හැර අනිත් 23 දෙනාම තෝරා ගන්නා ලදී. හාවඩ් විශ්වවිද්‍යාලයට 10 වතාවක්ම ඉල්ලුම් කළ නමුත් සෑම වරම ප්‍රතික්ෂේප විය. 1994 දී ඔහු අන්තර්ජාලය ගැන ඇසූ අතර, 1995 දී ඇමරිකාවට ගිය ගමනේදී පළමු වරට පරිගණකයක් සහ අන්තර්ජාලය භාවිතා කළේය. එහිදී "Beer" යන වචනය සෙවූ විට වෙනත් රටවල් ගැන තොරතුරු ආවත් චීනය ගැන කිසිවක් නොතිබීම ඔහු පුදුමයට පත් කළේය. 

 China Pages සිට Alibaba දක්වා

1995 අප්‍රේල් මාසයේදී ජැක් මා සහ ඔහුගේ බිරිඳ මිතුරෙකු සමඟ ඩොලර් 20,000ක් එකතු කර "China Yellow Pages" නම් සමාගම ආරම්භ කළේය. එය චීන සමාගම් සඳහා වෙබ් අඩවි නිර්මාණය කළ චීනයේ පළමු වාණිජ වෙබ් සමාගමක් විය. වසර 3ක් ඇතුළත සමාගම යුවාන් මිලියන 5ක්, එනම් ඩොලර් 800,000ක් පමණ වටිනාකමක් ලබා ගත්තේය. 1998-1999 කාලයේ ඔහු රජයේ තොරතුරු තාක්ෂණ සමාගමක ප්‍රධානියා ලෙස සේවය කළ අතර, 1999 දී ඉන් ඉවත් වී මිතුරන් 18 දෙනෙකු සමඟ සිය මහල් නිවාසයේදී "Alibaba" සමාගම ආරම්භ කළේය. පැය 2ක කතාවකින් පසු මිතුරන් 18 දෙනාම මුදල් එකතු කර ඩොලර් 60,000ක ආරම්භක ප්‍රාග්ධනයක් ලබා දුන්හ. "Alibaba" යන නම තෝරා ගත්තේ එය ගෝලීයව උච්චාරණය කිරීමට පහසු නිසාත්, "අලි බාබා සහ හොරු හතළිහ" කතාවේ "Open Sesame" මෙන් අවස්ථා විවෘත කරන දොරටුවක් වීමට අවශ්‍ය වූ නිසාත්ය. 

eBay සමඟ සටන සහ ලෝක ප්‍රසිද්ධිය

2002 දී SARS වෛරසය පැතිර යාමත් සමඟ චීනයේ මාර්ගගත සාප්පු සවාරි ප්‍රචලිත විය. එම වසරේම eBay සමාගම චීනයේ EachNet මිලදී ගෙන වෙළඳපොළට පිවිසීම ජැක් මාට තර්ජනයක් විය. ඊට පිළිතුරක් ලෙස 2003 දී ඔහු "Taobao" නම් වෙන්දේසි වෙබ් අඩවියක් ආරම්භ කළේය. එය කොමිස් රහිත සේවාවක් වූ අතර, eBay සමඟ සෘජුව තරඟ වැදුණි. "eBay සාගරයේ මෝරුන් නම්, අපි යැංසි ගඟේ කිඹුලන්" යැයි මා පැවසීය. අවසානයේ eBay සමාගම චීනයෙන් ඉවත් විය. Taobao සාර්ථක වීමෙන් පසු Alipay ගෙවීම් වේදිකාව ආරම්භ කළ අතර, එය දැන් ලියාපදිංචි පරිශීලකයින් මිලියන 800කට අධික සංඛ්‍යාවක් සිටින සේවාවකි. 2014 දී Alibaba සමාගම ඇමරිකානු කොටස් වෙළඳපොළට පිවිසි අතර, එය එවකට ලොව විශාලතම IPO එක විය. ජැක් මා චීනයේ ධනවත්ම පුද්ගලයා බවට පත් වූ අතර, 2019 දී විධායක සභාපති ධූරයෙන් ඉවත් වී අධ්‍යාපනය සහ පරිත්‍යාගශීලී කටයුතු සඳහා යොමු විය.