"Bill Gatesගේ සාර්ථකත්වය දෛවයේ තෑග්ගක් නෙමෙයි, ඒක ඔහු තනිවම හදාගත් මාර්ගයක්. හාවඩ් විශ්වවිද්යාලයෙන් අඩක් නතර කරලා, තමන්ගේ සිහිනය පස්සෙන් දුවපු කොල්ලෙක් ලෝකයේ විශාලතම මෘදුකාංග අධිරාජ්යය ගොඩනැගුවා. ඔහු හැම දවසකම “කාලය” කියන වටිනාම සම්පත තමන්ගේ වාසියට හරවා ගත්තා. එකම දේ ගැන පැය ගණන් හිතලා, කේත ලියලා, වැරදි හදාගෙන, ආයෙමත් උත්සාහ කළා. “මම හරිම දක්ෂ නිසා නෙමෙයි, මම හරිම නොපසුබට නිසායි” කියන එක Gatesගේ කතාවෙන් ඔප්පු වෙනවා. ඔහු පොත් කියවීම නවත්තපු දවසක් නැහැ.අදටත් සතියකට එක පොතක්වත් කියවනවා. ඔහුගේ රහස සරලයි: ලොකු සිහින දකින්න, ඒවා පුංචි පියවර වලට කඩන්න, කාලය කොටස් කරලා ඒ හැම පියවරකටම උපරිම අවධානය දෙන්න. ඔයාටත් දවසට තියෙන්නේ Gatesට තිබුණු පැය 24මයි. වෙනස තියෙන්නේ ඒවා පාවිච්චි කරන විදිහෙයි. අද පටන් ගන්න. ඔයාගේ “Microsoft” එක හදන්න තියෙන්නේ ඔයා අතේමයි."
ළමා කාලය සහ අධ්යාපනය
විලියම් හෙන්රි ගේට්ස් III, එහෙමත් නැත්නම් බිල් ගේට්ස් උපත ලැබුවේ 1955 ඔක්තෝබර් 28 වන දින ඇමරිකාවේ සියැටල් නගරයේදීය. ඔහුගේ පියා විලියම් එච්. ගේට්ස් ජ්යෙෂ්ඨ නීතිඥයෙකු වූ අතර මව මේරි ගේට්ස් පාසල් ගුරුවරියක් හා සමාජ සේවිකාවක් විය. කුඩා කාලයේ සිටම බිල් ගණිතයට සහ පරිගණක ක්රමලේඛනයට අති දක්ෂයෙක් විය. වයස අවුරුදු 13 දී ඔහු සියැටල්හි ලේක්සයිඩ් පෞද්ගලික පාසලට ඇතුළත් වූ අතර, එහිදී ඔහුට පළමු වරට පරිගණකයක් භාවිතා කිරීමට අවස්ථාව ලැබුණි. එම පාසලේදී ඔහුට පෝල් ඇලන් හමුවූ අතර දෙදෙනා එක්ව ක්රමලේඛන අත්හදා බැලීම් ආරම්භ කළහ. පසුව 1973 දී ඔහු හාවඩ් විශ්වවිද්යාලයට ඇතුළත් වී පූර්ව නීති විෂය හැදෑරුවද, පරිගණක කෙරෙහි තිබූ දැඩි ඇල්ම නිසා උපාධිය සම්පූර්ණ නොකරම විශ්වවිද්යාලයෙන් ඉවත් විය.
මයික්රොසොෆ්ට් සමාගම ආරම්භ කිරීම
1975 දී බිල් ගේට්ස් සහ ඔහුගේ ළමා මිතුරා පෝල් ඇලන් එක්ව "මයික්රොසොෆ්ට්" සමාගම ආරම්භ කළහ. ඔවුන්ගේ පළමු නිෂ්පාදනය වූයේ MITS සමාගමේ Altair 8800 පරිගණකය සඳහා ලියූ BASIC පරිගණක භාෂාවයි. මයික්රොසොෆ්ට් සමාගමට විශාලම ජයග්රහණය ලැබුණේ 1980 දී IBM සමාගම ඔවුන්ගේ පුද්ගලික පරිගණක සඳහා මෙහෙයුම් පද්ධතියක් නිර්මාණය කිරීමට මයික්රොසොෆ්ට් වෙත පැවරීමත් සමඟය. එහිදී ගේට්ස් ඉතා බුද්ධිමත් තීරණයක් ගත්තේය. ඔහු DOS මෙහෙයුම් පද්ධතියේ අයිතිය IBM සමාගමට නොදී, එය වෙනත් සමාගම්වලටද විකිණීමේ අයිතිය තම සමාගම සතුකර ගත්තේය. එම තීරණය නිසා MS-DOS සහ පසුව 1985 දී හඳුන්වා දුන් Windows මෙහෙයුම් පද්ධතිය ලොව පුරා ගෘහස්ත පරිගණකවල ප්රමිතිය බවට පත් වූ අතර, Word, Excel, PowerPoint වැනි මෘදුකාංග සමඟින් මයික්රොසොෆ්ට් සමාගම ලෝකයේ විශාලතම මෘදුකාංග සමාගම බවට පත් විය.
ලෝකයේ ධනවතෙකු වීම සහ නායකත්වය
මයික්රොසොෆ්ට් සමාගමේ සීඝ්ර වර්ධනයත් සමඟ 1995 දී බිල් ගේට්ස් ලොව ධනවත්ම පුද්ගලයා බවට පත් විය. 1986 දී මයික්රොසොෆ්ට් කොටස් වෙළඳපොළට නිකුත් කළ විට ඔහුගේ කොටස්වල වටිනාකම නිසා ඔහු බිලියනපතියෙකු බවට පත් විය. ඔහු සමාගමේ සභාපති, ප්රධාන විධායක නිලධාරී සහ ප්රධාන මෘදුකාංග ගෘහ නිර්මාණ ශිල්පියා ලෙස කටයුතු කළ අතර, නිකුත් කරන සෑම කේත පේළියක්ම පෞද්ගලිකව පරීක්ෂා කිරීමට තරම් සිය රාජකාරියට කැපවී සිටියේය. 1970-80 දශකවල ක්ෂුද්ර පරිගණක විප්ලවයේ ප්රධාන ව්යවසායකයෙකු ලෙස ඔහු සැලකේ.
පරිත්යාගශීලියා සහ වර්තමාන ජීවිතය
2000 වසරේදී බිල් ගේට්ස් මයික්රොසොෆ්ට් සමාගමේ ප්රධාන විධායක නිලධාරී ධූරයෙන් ඉවත් වී, සිය බිරිඳ මෙලින්ඩා සමඟ ආරම්භ කළ "බිල් සහ මෙලින්ඩා ගේට්ස් පදනම" හරහා පරිත්යාගශීලී කටයුතු සඳහා සම්පූර්ණ කාලය යෙදවීමට තීරණය කළේය. මෙම පදනම ගෝලීය සෞඛ්ය තත්ත්වය නංවාලීම, දරිද්රතාවය තුරන් කිරීම සහ පෝලියෝ වැනි රෝග නිවාරණය කිරීම සඳහා ලොව පුරා විශාල සේවාවක් ඉටු කරයි. තාක්ෂණික නවෝත්පාදකයෙකු ලෙස ලෝකය වෙනස් කළ ඔහු, දැන් බලපෑම් සහගත පරිත්යාගශීලියෙකු ලෙස මිලියන සංඛ්යාත ජනතාවකගේ ජීවන තත්ත්වය උසස් කිරීමට කටයුතු කරයි.
